Punonjësit e kompanisë së naftës Bankers Petroleum kanë hyrë në grevë pas disa protestave të zhvilluara ditët e fundit, duke kërkuar përmirësime urgjente në kushtet e punës dhe pagat. Ata kërkojnë uljen e diferencës së madhe mes pagave të larta dhe atyre të ulëta, duke kërkuar që asnjë punonjës të mos paguhet më pak se 1000 euro neto pagë bazë. Përveç rritjes së pagave, naftëtarët kërkojnë trajtim ushqimor e shëndetësor dhe ndalimin e arrogancës nga ana e drejtuesve të kompanisë.
Sindikalistët kanë sqaruar se kërkesa e tyre zyrtare është rritja e fondit të përgjithshëm të pagave me 9%, ku kjo shtesë do të shpërndahet në mënyrë transparente për punonjësit me paga të ulëta, përmes një komisioni ku do të përfshihen edhe përfaqësues të Sindikatës. Po ashtu, 1% e këtij fondi do të shkojë për krijimin e fondit sindikal. Megjithatë, nëse kompania refuzon këtë marrëveshje, punonjësit paralajmërojnë rritjen e kërkesës për 18% në fondin e pagave dhe fillimin e grevës së përgjithshme.
Gjatë protestës, punonjësit kanë refuzuar ofertën e kompanisë për një shtesë prej 4200 lekësh në muaj për dietën ushqimore, duke theksuar se kjo nuk adreson problemin kryesor të pabarazisë së pagave. Ata kërkojnë që të trajtohen drejtë ata që mbajnë mbi shpinë punën më të vështirë dhe paguhen më pak, duke garantuar transparencë dhe respekt në marrëdhëniet e punës. Greva ka nisur që nga ora 07:00 përpara zyrave të kompanisë në Marinëz, dhe punonjësit shprehen të vendosur për të qëndruar në kauzën e tyre deri në zgjidhje.
