Një operacion për dëbimin e një familjeje nga një shtëpi fshati në periferi të Veronës, Itali, përfundoi në një tragjedi të rëndë: tre oficerë të karabinierëve humbën jetën dhe 18 të tjerë, ushtarakë, oficerë policie dhe zjarrfikës, mbetën të plagosur në një shpërthim të dhunshëm të shkaktuar qëllimisht nga banorët e shtëpisë.
Toger Marco Piffari, 56 vjeç, Brigadier Valerio Daprà, 56 vjeç dhe Karabinieri Davide Bernardello, 36 vjeç, humbën jetën në krye të detyrës. Ata ishin pjesë e njësive elitare të ndërhyrjes së shpejtë dhe kishin marrë pjesë në operacionin e planifikuar prej ditësh për dëbimin e Franco (65), Dino (63) dhe Maria Luisa Ramponi (59), të cilët për vite me radhë i kishin rezistuar vendimit gjyqësor për lëshimin e banesës.
Shpërthimi ndodhi në orën 03:14 të mëngjesit, kur njësitë speciale po hynin në ndërtesë. Familja kishte mbushur shtëpinë me gaz të rrjedhur nga bombolat e vendosura në dhoma të ndryshme. Pasi u hap dera e përparme, një fitil i ndezur, dyshohet nga Maria Luisa, shkaktoi shpërthimin vdekjeprurës që shkatërroi plotësisht katin e sipërm të shtëpisë.
Ekipet e shpëtimit, përfshirë njësitë USAR, zjarrfikës nga Venecia, njësitë me qen dhe ambulancat emergjente, mbërritën menjëherë për të nxjerrë të mbijetuarit nga rrënojat. 14 karabinierë, 3 oficerë të UOPI-t dhe 1 zjarrfikës u plagosën, shumica jashtë rrezikut për jetën, por disa në gjendje të rëndë.
Maria Luisa dhe Dino Ramponi, që pësuan djegie, ndodhen në spital dhe janë nën arrest për vrasje me paramendim. Franco Ramponi, i cili u arratis menjëherë pas shpërthimit, u kap disa orë më vonë në një fushë pranë vendngjarjes. Prokuroria po heton gjithashtu për krim të masakrës dhe sulm ndaj forcave të rendit.
Në çatinë dhe brenda banesës u gjetën bombola gazi, kokteje Molotov dhe prova të tjera që sugjerojnë një përgatitje të qëllimshme për të shkaktuar viktima.
Familja Ramponi është përfshirë në përplasje të përsëritura me autoritetet që nga viti 2014, kur nisën problemet financiare dhe procedurat e shpronësimit për shkak të një hipoteke të diskutueshme. Ata pretendojnë se nënshkrimet në kontratat e kredisë ishin të falsifikuara, por gjykatat nuk i dhanë të drejtë dhe vendimi për dëbimin u bë përfundimtar.
Në tetor dhe nëntor 2024, ata kishin kërcënuar të hidhnin veten në erë për të ndalur përmbaruesit. Franco dhe Maria Luisa ishin ngjitur në çati dhe kishin hapur bombolat e gazit. Në atë rast, ndërhyrja e autoriteteve shmangu tragjedinë. Por këtë herë, paralajmërimi u bë realitet.
Fqinjët raportuan se familja Ramponi jetonte në kushte ekstreme, pa energji, pa ujë dhe në izolim të plotë.
“Kishin thënë se do të hidheshin në erë nëse përpiqeshin t’i dëbonin. Këtë herë e bënë.”
