Sot në orën 19:00, stadiumi “Air Albania” do të jetë arena e një prej sfidave më të nxehta të futbollit shqiptar derbit të kryeqytetit mes Tiranës dhe Partizanit, i vlefshëm për javën e gjashtë të Superligës.
Si gjithmonë, kjo ndeshje nuk është thjesht një duel sportiv. Është një betejë prestigji, krenarie dhe historie mes dy rivalëve të përjetshëm. Që në orët e pasdites, ultrasit Fanatics të Tiranës kanë nisur marshimin e tyre drejt stadiumit me thirrje, britma e kore që kanë përfshirë rrugët e kryeqytetit. Me tymuese, flakadanë dhe banderola, ata kanë ndezur atmosferën duke e kthyer qytetin në një “paradë” të ngjyrave bardheblu.
Ky derbi është i njohur jo vetëm për tensionin sportiv, por edhe për përplasjen e mentaliteteve, ku secila palë kërkon të tregojë se “kryeqyteti është i tyre”. Me të dyja skuadrat që kërkojnë fitoren për të konsoliduar pozitat në kampionat, pritet një mbrëmje e mbushur me emocione, spektakël dhe adrenalinë.
Në fund të ditës, vetëm një skuadër do të dalë fituese nga fusha, por magjia e derbit është se për tifozët, kjo përballje vlen më shumë se një kampionat i tërë.
