Protestat për shkak të heqjes të ujit dhe energjisë elektrike, të frymëzuara nga protestat e “Gen Z” në vende të tjera, kanë lënë të paktën 22 të vdekur, sipas OKB-së.
Presidenti i Madagaskarit, Andry Rajoelina, ka shpërndarë qeverinë pas protestave të udhëhequra nga të rinjtë për ndërprerjet e energjisë elektrike dhe ujit, ku sipas OKB-së, të paktën 22 persona kanë humbur jetën dhe mbi 100 të tjerë janë plagosur.
Të frymëzuar nga protestat e “Gen Z” në Kenia dhe Nepal, demonstratat që zgjatën tre ditë janë më të mëdhatë që ishulli në Oqeanin Indian ka parë prej vitesh, dhe sfida më serioze që Rajoelina ka përjetuar që nga rizgjedhja e tij në vitin 2023.
“E pranojmë dhe kërkojmë falje nëse anëtarët e qeverisë nuk kanë kryer siç duhet detyrat e tyre,” tha Rajoelina në një fjalim në televizionin shtetëror Televiziona Malagasy.
“E kuptoj zemërimin, trishtimin dhe vështirësitë e shkaktuara nga ndërprerjet e energjisë dhe problemet me furnizimin me ujë. E dëgjova thirrjen, e ndjeva dhimbjen, e kuptova ndikimin në jetën e përditshme,” tha ai.
Ai shtoi se aplikimet për një kryeministër të ri do të pranohen gjatë tre ditëve të ardhshme përpara se të formohet një qeveri e re. Presidenti deklaroi gjithashtu se dëshironte të krijonte hapësirë për dialog me të rinjtë dhe premtoi masa për të ndihmuar bizneset e prekura nga plaçkitjet.
Qindra njerëz, shumë prej tyre të veshur me të zeza, duke thirrur për dorëheqjen e Rajoelinës, kanë marshuar në kryeqytetin Antananarivo që nga fillimi i protestave javën e kaluar.
Policia ka reaguar me forcë, duke përdorur gaz lotsjellës dhe plumba gome për të shpërndarë turmat. Mbi 100 persona janë plagosur.
Zyra e të drejtave të njeriut e OKB-së fajësoi “reagimin e dhunshëm” të forcave të sigurisë për disa nga viktimat, ndërsa të tjerat u shkaktuan nga dhuna dhe plaçkitjet e bandave që nuk kishin lidhje me protestuesit.
Ministria e Jashtme e Madagaskarit hodhi poshtë shifrat e viktimave të raportuara nga OKB-ja, duke thënë se të dhënat nuk vinin nga autoritetet kompetente kombëtare dhe ishin “të bazuara në thashetheme ose keqinformim”.
Protestuesit kanë adoptuar një flamur të përdorur në Nepal, ku protestat detyruan kryeministrin të jepte dorëheqjen më herët këtë muaj, dhe gjithashtu kanë përdorur taktika të ngjashme organizimi online si protestat në Kenia vitin e kaluar, të cilat përfunduan me tërheqjen e një projektligji të diskutueshëm për taksat.
Madagaskari është një nga vendet më të varfra në botë dhe ka përjetuar shpesh kryengritje popullore që nga shpallja e pavarësisë në vitin 1960, përfshirë protestat masive të vitit 2009 që detyruan ish-presidentin Marc Ravalomanana të largohej nga pushteti.
