Të dhënat e fundit zyrtare zbulojnë se 50% e punonjësve në Shqipëri fitojnë më pak se 63,456 lekë bruto në muaj (rreth 630 euro). Ky është niveli i pagës mediane për tremujorin e dytë të vitit 2025, treguesi që pasqyron më qartë realitetin e shumicës së punonjësve.
Ndërkohë, paga mesatare bruto në të njëjtën periudhë ishte mbi 83 mijë lekë (rreth 830 euro). Diferenca prej 24% tregon se shumica e shqiptarëve marrin më pak sesa sugjeron mesatarja, e cila shpesh ndikohet nga pagat shumë të larta të një pakice të vogël.
Ekspertët theksojnë se paga mediane është një masë më e drejtë për të matur pabarazinë në paga dhe standardin e jetesës, pasi tregon se ku ndodhet punonjësi tipik, jo vetëm mesatarja statistikore.
Për shumë punonjës shqiptarë, kjo pagë mbetet ende larg kostos reale të jetesës.
