Një ngjarje e pazakontë ka ndodhur gjatë mbledhjes së Këshillit Bashkiak në Vlorë këtë të hënë, ku një qytetar i revoltuar ka ndërprerë seancën duke hyrë me forcë në sallën e diskutimeve.
Sipas dëshmitarëve, ai shtyu derën me nervozizëm dhe kërkoi me zë të lartë sqarime për vonesën e shpronësimit të pronës së tij, duke deklaruar se prej pesë vitesh po pret kompensimin. Qytetari u përplas verbalisht me një prej këshilltarëve, të cilin e akuzoi për mashtrime, ndërsa debati u shoqërua me tone të ashpra dhe fjalë ofenduese.
Pasi u largua nga salla, ai u shpreh shkurt për mediat se rreth 25 persona të tjerë ndodhen në të njëjtën situatë, duke akuzuar institucionet për shtyrje të përsëritura dhe manipulime.
Forcat e Policisë së Shtetit mbërritën menjëherë në vendngjarje, bënë të mundur qetësimin e situatës dhe shoqëruan qytetarin për verifikime të mëtejshme.
