Një episod i papritur ka ndodhur mbrëmjen e premierës së operës “La Traviata” në Teatrin Kombëtar të Operës dhe Baletit, ku sopranoja e njohur Eva Golemi është rrëzuar gjatë skenës finale.
Ngjarja ndodhi në momentin dramatik kur personazhi i Violetës jep shpirt në krahët e Alfredos. Në vend që të përfundonte në duart e tenorit Mario Rojas, Golemi u rrëzua në skenë, pasi partneri nuk reagoi në kohë.
Menjëherë pas incidentit, stafi i teatrit thirri ambulancën për të garantuar ndihmën e parë mjekësore. Sopranoja u dërgua në spital për kontrolle të detajuara, ndërsa fatmirësisht ndodhet në gjendje të mirë shëndetësore.
Mjekët i kanë rekomanduar pushim dhe për këtë arsye Golemi do të mungojë në shfaqjen e së hënës. Roli i Violetës do të interpretohet nga një soprano tjetër, derisa ajo të rikuperohet plotësisht.
“La Traviata”, një nga operat më të njohura në botë, mbetet një kryevepër e Giuseppe Verdit. Historia e saj është frymëzuar nga jeta e kurtizanes franceze Marie Duplessis, e cila ishte dashuria e madhe e shkrimtarit Alexandre Dumas i riu, autor i romanit “La Dame aux camélias”.
Shkrimi i përket TVA News!
