Banorët e fshatrave Vërmik, Bashaj, Matogjin, Verbas, Ramicë dhe Velçë janë ngritur sërish në protestë këtë të dielë, duke kërkuar ndërtimin e rrugës që i lidh me rrugën e Lumit të Vlorës. Të revoltuar nga mosveprimi i institucioneve, dhjetëra qytetarë kanë bllokuar përkohësisht segmentin kryesor, si formë reagimi ndaj indiferencës që, sipas tyre, po zvarrit zgjidhjen e këtij problemi të kahershëm.
Kjo është hera e dytë që banorët protestojnë për të njëjtën çështje, pasi edhe më parë kanë denoncuar publikisht se ndërtimi i kësaj rruge ishte premtuar gjatë fushatës elektorale, por më pas është lënë në harresë. Mungesa e asfaltimit e ka bërë të vështirë lëvizjen në zonë, sidomos në periudha me reshje, duke izoluar fshatrat dhe penguar aksesin në shërbime bazë.
Banorët i kanë bërë thirrje deputetëve të qarkut që të mos shfaqen vetëm gjatë fushatave me premtime boshe, por të mbajnë përgjegjësi për fjalët e dhëna. Ata kërkojnë që investimi për rrugën të nisë sa më parë, duke paralajmëruar se do të vazhdojnë protestat nëse kërkesat e tyre do të injorohen përsëri.
