Policia spanjolle (Mossos d’Esquadra), në bashkëpunim me Policinë Lokale të Castelldefels, ka arrestuar tre shtetas shqiptarë pasi janë kapur në flagrancë me 16 kilogramë kokainë, me një vlerë të vlerësuar mbi 500,000 euro në tregun e zi.
Sipas burimeve zyrtare dhe mediave spanjolle, arrestimet ndodhën më 22 shtator në një parking pranë një supermarketi në qendër të qytetit. Oficerë civilë, pjesë e një njësie të përbashkët kundër vjedhjeve dhe trafikut të drogës, vunë re lëvizje të dyshimta nga një grup burrash që ndërronin sende mes automjeteve.
Policia ndërhyri menjëherë, duke ndaluar një furgon dhe duke kontrolluar një valixhe të zhvendosur midis dy automjeteve, ku u gjetën 16 kilogramë substancë që dyshohet të jetë kokainë. Gjithashtu, u sekuestruan mbi 7,000 euro para të gatshme dhe rreth 200 euro në lekë shqiptare.
Tre të dyshuarit, të moshës 20 deri në 46 vjeç dhe me kombësi shqiptare, u ndaluan nën akuzën e trafikut të drogës. Pas paraqitjes në Gjykatën e Gavas më 24 shtator, gjyqtari urdhëroi arrest me burg për të tre.
Autoritetet spanjolle theksojnë se origjina e të arrestuarve është e pazakontë për këtë lloj droge, pasi shqiptarët zakonisht lidhen me trafikun ndërkombëtar të marijuanës. Megjithatë, hetuesit paralajmërojnë për zgjerimin e aktivitetit të rrjeteve kriminale, të cilat po investojnë gjithnjë e më shumë në trafikun e lëndëve narkotike të forta.
Hetimet vazhdojnë për të përcaktuar rolin e secilit prej të ndaluarve, si dhe për të zbuluar origjinën dhe destinacionin e kokainës. Rasti është nën hetimin e Njësisë Hetimore të policisë së Gavas dhe konsiderohet pjesë e përpjekjeve për të goditur rrjetet ndërkombëtare të trafikut të drogës.
