Një mbrëmje e mbushur me emocione dhe shpresë u shënua në emisionin “Për Shqiptarët”, ku u realizua amaneti i ndjerë i Kreshnik Tomanit. Falë zemërgjerësisë së qindra shqiptarëve, tre fëmijët jetimë të tij hynë më në fund në shtëpinë e re, një strehë e sigurt dhe plot dashuri.
Çelësin e shtëpisë e hapi vetë vajza 10-vjeçare, Nikita, ndërsa fytyrat e saj, motrës, vëllait dhe nënës rrezatonin gëzim e lehtësim. Ambientet e reja janë të kompletuara me çdo gjë të nevojshme, ashtu siç Kreshniku kishte ëndërruar për familjen e tij.
Mbrëmja u bë edhe më prekëse kur Nikita interpretoi një këngë kushtuar babait, shoqëruar nga zërat e Irma Libohovës dhe Sidrit Bejlerit. Zëri i saj i pastër përloti të pranishmit dhe shikuesit, duke treguar forcën dhe ëndrrën e saj për t’u bërë këngëtare – një dëshirë që i ati do ta kishte mbështetur me gjithë zemër.
Ky moment i paharrueshëm shënon një fillim të ri për familjen Tomani, ndërsa kujtimi dhe dashuria për Kreshnikun do t’i udhëheqë gjithmonë.
