Saimir Kolaveri i cili ra në prangat e policisë italiane pasditen e djeshme pas një urdhër-arresti të lëshuar nga SPAK nuk është një emër i panjohur për organet e rendit. I përfolur prej vitesh si porositës atentatesh dhe ndërmjetësues vrasjesh, ai ka ditur gjithmonë t’i shpëtojë policisë dhe të zhduket pa lënë gjurmë.
Emri i tij doli në skenë për herë të parë më 27 korrik 2018, kur në Bathore shpërtheu një sasi tritoli në banesën e prindërve të Gazmir Dacit. Hetimet zbuluan se Kolaveri kishte urdhëruar 23-vjeçarin Vilson Brahaj që të kryente shpërthimin, si hakmarrje për vrasjen e Valmir Kolaverit dhe plagosjen e vëllait të tij, Robertit, në nëntor të atij viti. Konflikti, sipas burimeve, kishte lindur nga prishja e pazareve të drogës në Francë. Pas kësaj ngjarjeje, Kolaveri u shpall në kërkim dhe u largua nga Shqipëria.
Por historia nuk ndalet këtu. Para gjykatës, Vilson Brahaj deklaroi se Kolaveri i kishte ofruar 5 mijë euro për shpërthimin, duke i thënë se banesa ishte e tij dhe se ngjarja ishte një “skenar” i sajuar për të justifikuar kërkesën për azil jashtë vendit. Një manovër që të kujton skenat e filmave të aksionit.
Sot, emri i Kolaverit është rikthyer sërish në qendër të vëmendjes. SPAK ka lëshuar urdhër-arrest për të, në kuadër të hetimeve për vrasjen e Klevis Lleshit në vitin 2020. Ai akuzohet se ka qenë ndërmjetësuesi mes Aurel Hoxhës, i cili porositi ekzekutimin për 50 mijë euro, dhe ekzekutorit të dyshuar, Sabah Nuzi.
Ekstradimi i tij pritet ta përballë përfundimisht me drejtësinë shqiptare, duke e lidhur edhe një herë me sagën e përgjakshme të gjakmarrjes mes familjeve Lleshi dhe Hoxha.
