Ambasadori i Rusisë në Francë, Alexey Meshkov, ka lëshuar një paralajmërim të ashpër përballë NATO-s, duke deklaruar se çdo tentativë për të rrëzuar një avion rus, edhe nën arsyetimin e shkeljes së hapësirës ajrore të aleancës, do të përfundonte pa mëdyshje në një përplasje të armatosur.
Në një intervistë për radion franceze RTL, Meshkov u shpreh se një veprim i tillë do të ishte një hap i drejtpërdrejtë drejt luftës, duke i cilësuar kërcënimet aktuale si provokime të rrezikshme. Ai kujtoi se avionët e NATO-s kanë kaluar shpesh në hapësirën ajrore të Rusisë, por asnjëherë nuk janë goditur nga forcat ruse.
Deklarata e tij erdhi pas komenteve të presidentit amerikan, Donald Trump, i cili kërkoi që vendet e NATO-s të rrëzojnë aeroplanët rusë nëse shkelin hapësirën e bllokut. Nga ana tjetër, presidenti francez Emmanuel Macron mbajti një linjë më të matur, duke nënvizuar se anëtarët e aleancës duhet të shmangin veprime ekstreme në situata të tilla.
