Një tentativë për arratisje është regjistruar në orët e para të mëngjesit të djeshëm në burgun e Fierit, ku i dënuari për vrasje, Bledar Selmanaj, ka tentuar të largohet nga institucioni i vuajtjes së dënimit.
Ngjarja ndodhi rreth orës 03:00, në kohën kur oficerët e sigurisë po ndërronin turnin.
Mësohet se Selmanaj kishte lidhur dorën me një peshqir dhe kishte tentuar të çante suvanë e qelisë së tij, duke hapur një vrimë në mur. Pas kësaj, ai ka arritur të ngjitet deri në tarracën e burgut, por është pikasur në kohë nga gardianët, të cilët ndërhynë menjëherë duke neutralizuar të burgosurin dhe shoqëruar atë në dhomat e sigurisë së lartë.
Bledar Selmanaj është dënuar për vrasjen e 25-vjeçarit Xhulian Bullari në vitin 2021 në fshatin Babicë të Vlorës. Ai u arrestua më 21 gusht të po atij viti në zonën e ish-Bllokut në Tiranë, katër ditë pas krimit.
Nuk është hera e parë që Selmanaj krijon situata alarmante në burg.
Më herët, gjatë qëndrimit në burgun e Peqinit, ai ka tentuar edhe vetëvrasjen, por ndërhyrja në kohë e gardianëve ka parandaluar tragjedinë.
Autoritetet kanë nisur hetimet për të zbuluar nëse ka pasur ndihmë të brendshme apo mangësi në sistemin e sigurisë që mund të kenë lehtësuar tentativën e arratisjes.
