Një zjarr i përmasave të mëdha ka përfshirë sot një beach bar në zonën bregdetare të Jonufrit, në Vlorë, duke shkaktuar dëme të shumta materiale.
Ngjarja ka ndodhur para pak minutash dhe ka shkaktuar panik mes pushuesve dhe banorëve të zonës, ndërsa flakët përfshinë me shpejtësi të gjithë godinën.
Sipas burimeve paraprake, shkak i zjarrit dyshohet të jetë bërë një shkëndijë elektrike në instalimet e brendshme të lokalit, edhe pse pushuesit dyshojne per bombul gazi. Ambienti ishte i ndërtuar kryesisht me materiale druri dhe të lehta, çka favorizoi përhapjen e shpejtë të flakëve.
Forcat zjarrfikëse kanë mbërritur menjëherë në vendngjarje dhe po punojnë për të vënë zjarrin nën kontroll dhe për të shmangur përhapjen e tij në strukturat përreth, ku ndodhen edhe biznese të tjera sezonale.
Fatmirësisht, nuk ka të lënduar, por dëmet materiale janë të konsiderueshme. Objekti është shkrumbuar plotësisht dhe aktualisht autoritetet kanë nisur hetimet për të përcaktuar me saktësi shkakun e ngjarjes.
