Gjykata e Fierit ka dënuar me 25 vite burg një 67-vjeçar nga Berati, pasi ka abuzuar seksualisht me një vajzë të mitur 12-vjeçare. Ngjarja e rëndë ka ndodhur në Lushnje në vitin 2023, kur i akuzuari, Xhevair Veizi ka shfrytëzuar gjendjen ekonomike të familjes së vajzës dhe njohjet me ta, për të abuzuar me të miturën.
Ai e ka ftuar vajzën në një banesë me qira, ku ka kryer marrëdhënie seksuale me të. Gjatë arrestimit, në banesë u gjetën dy armë dhe municion luftarak. Përveç akuzave për abuzim, ai është hetuar edhe për shfrytëzim prostitucioni dhe armëmbajtje pa leje. Hetimet janë ende në vazhdim për zbardhjen e plotë të ngjarjes dhe sigurimin e drejtësisë për viktimën.
Vendimi u mor me kërkesë të Prokurorisë, e cila e akuzoi atë për veprën penale “Marrëdhënie seksuale ose homoseksuale me të mitur”, parashikuar nga neni 100 i Kodit Penal. Fillimisht ndaj tij u ngritën edhe akuza të tjera si “Shfrytëzim prostitucioni” dhe “Mbajtja pa leje e armëve”, por për këto është ndarë procedimi penal.
