Kanali kryesor kullues në zonën e Fermë-Çlirimit në Fier është aktualisht i bllokuar, duke shkaktuar probleme serioze për banorët dhe fermerët e kësaj zone bujqësore.
Fermerët shprehen se situata po bëhet gjithnjë e më e rëndë dhe paralajmërojnë se, nëse nuk merren masa të menjëhershme, dëmet do të jenë të konsiderueshme, sidomos tani që pritet të fillojnë reshjet e stinës. Sipas tyre, ky nuk është një problem i ri, por ai është neglizhuar prej kohësh.
Ata kërkojnë nga Bashkia ndërhyrje të menjëhershme për pastrimin dhe rehabilitimin e kanalit, në mënyrë që të sigurohet kullimi normal i ujërave dhe të mbrohen investimet bujqësore në zonë.
Në një kohë kur bujqësia mbetet një nga burimet kryesore të të ardhurave për banorët lokalë, mirëmbajtja e infrastrukturës vaditëse dhe kulluese duhet të jetë prioritet i institucioneve vendore. Banorët theksojnë se nuk kërkojnë asgjë më shumë veç zbatimit të detyrimeve nga ana e autoriteteve lokale.
