Prej disa ditësh opinioni publik është duke u marrë me thashetheme për dasmën e shumëpërfolur të Genar Topallit, djali i deputetes Jozefina Topalli, dhe moderatores Cindy Marina.
Ata u kurorëzuan në Romë në një ambient që është përfolur për shifra të kushtueshme të dhënies me qira për ceremoni. Ajo që tërhoqi më shumë vemëndjen e publikut ishte dekori i kushtueshëm, madje dhe veshjet e protagonistëve.
Reagimi i moderatores Eva Murati, e cila më parë ka qenë në një lidhje me Genarin, ndezi më shumë debatet, ku publiku u shpreh se vlera e dasmës ishte rreth 500 mijë euro.
"Nuk dua që milionë shqiptarë të më dëshirojnë të vdekur sepse po mburrem me para që mund të jenë të vjedhura nga fondet publike. E di që më ndjek çdo ditë, por ta bësh këtë një ditë pas dasmës tënde është më shumë se patetike", shkroi Eva në një koment në TikTok.
Por së fundmi një reagim i gjatë dhe publik ka ardhur nga Genar Topalli, i cili më shumë se sa të sqarojë publikun, duke se e kishte një përgjigje për ish-partneren e tij, që pretendoi se dasma është bërë me para të vjedhura nga populli.
Ai thotë se dasma është ideuar nga vetë ai dhe Cindy, ndërkohë që për shpenzimet ka kontribuar vjehrria.
Reagimi i plotë:
Të dashur miq, familjarë dhe të njohur,
Më 13 shtator 2025 përjetova ditën më të bukur të jetës sime: u kurorëzova me Cindy Marina.
Edhe pse nuk kemi asnjë detyrim të japim shpjegime për jetën private, dua ta bëj këtë reagim për transparencë. Ceremonia u zhvillua në Bazilikën e Shën Marisë, te Altari i Qiejve – një bekim i madh shpirtëror, për të cilin, siç dihet, nuk ka pagesë, por vetëm një donacion simbolik.
Më pas, darka u mbajt në një ambient në Romë, me kosto që nuk kalon shpenzimet e zakonshme të një dasme në Shqipëri (çdokush mund ta verifikojë lehtësisht me një kërkim të thjeshtë në Google). Gjithçka është menduar, organizuar dhe financuar prej meje dhe Cindy-t, me mbështetjen e prindërve të saj.
Ne jetojmë e punojmë në SHBA, ku drejtojmë së bashku biznesin tonë në fushën e transportit, ndërsa Cindy, përveç angazhimeve të tjera, menaxhon një nga klubet më të mëdha të volejbollit në Kaliforninë Jugore, në pronësi të familjes së saj.
Prindërit e Cindy-t jetojnë në SHBA prej afro 30 vitesh dhe sot kanë ndërtuar biznese të suksesshme në fushën e transportit dhe të sportit, me mbi 150 të punësuar.
Ky sqarim bëhet vetëm për të shmangur çdo keqkuptim dhe për të hedhur poshtë komentet me shifra krejtësisht të pavërteta e spekulative.
Falënderoj me zemër të gjithë ju që na uruat në këtë ditë të shenjtë për familjen tonë.
Me respekt, Genar Topalli
