Mbrëmja e sotme pritet të jetë një festë futbolli, me ndeshje që premtojnë gola, emocione dhe spektakël në çdo stadium.
Në “Anfield”, Liverpool i Slot përballet me Atletico Madrid-in e Simeones. Një duel stilesh krejt të kundërta: presioni dhe intensiteti i “reds”-ave kundër disiplinës së hekurt dhe pragmatizmit të “colchoneros”. Çdo duel në mesfushë do të jetë një betejë më vete.
Në “Allianz Arena” zbret supersfida Bayern – Chelsea. Bavarezët duan të tregojnë dominimin e tyre para tifozëve, ndërsa “blutë” londinezë ëndërrojnë një fitore të madhe në transfertë për të ndezur shpresat në Europë.
Nga Holanda vjen klasiku Ajax – Inter. Një përballje mes talentit dhe teknikës së “tulipanëve” dhe forcës e eksperiencës së zikaltërve. Chivu kërkon reagim të menjëhershëm pas disfatës në Serie A ndaj Juventusit, ndërsa Ajax synon të befasojë me futbollin e tij ofensiv.
Spektakli mbyllet në “Parc des Princes”, ku PSG ndeshet me Atalantën. Parizienët, kampionë në fuqi, do të hedhin në fushë arsenalin e tyre sulmues për të treguar se mbeten pretendentë kryesorë. Por përballë kanë bergamaskët e Gasperinit, një skuadër simpatike dhe e guximshme që gjithmonë kërkon të thyejë pritshmëritë.
Champions-i vazhdon të dhurojë net magjike dhe mbrëmja e sotme pritet të jetë një prej tyre.
