Një publikim i gazetares Esiona Konomi ka nxjerrë në dritë një shembull flagrant sesi kabinetet politike shndërrohen në streha për “qoka”, të paguara me paratë e qytetarëve, por pa funksione reale.
Sipas saj, kabineti i ish-kryetares së Kuvendit, Elisa Spiropali, i cili u shkarkua i gjithi “me urgjencë” nga pasardhësi Niko Peleshi, ishte i mbushur me emra të njohur e të çuditshëm në role këshilltarësh e ekspertësh.
Në listë bie në sy moderatorja dhe ish-banore e “Big Brother Vip”, Zhaklina Gjolla, që mbante postin e zëdhënëses së kabinetit, por sipas Konomit nuk ka pasur asnjë komunikim me gazetarët – puna e saj e vetme ishin “reels-at” për rrjetet sociale të Spiropalit.
Po ashtu, ish-eurodeputeti gjerman Knut Fleckenstein paguhej 1,600 euro në muaj si “këshilltar”, pa ndonjë sqarim se çfarë kontributi konkret jepte. Djali i kryebashkiakut të Shkodrës, Edon Beci, rezulton me rrogë 1,800 euro si këshilltar, ndërsa me të njëjtën pagesë figuron edhe ish-deputeti socialist, Sadi Vorpsi. Në listë është edhe analisti Lorenc Vangjeli, që çdo mbrëmje shfaqet në televizione për të komentuar politikën, por njëkohësisht merrte pagesë si “ekspert i jashtëm” në kabinetin e Spiropalit.
Gazetarja ngre pikëpyetje se çfarë këshillash, ekspertizash apo funksionesh reale kanë ofruar këta persona, përveçse kanë rënduar buxhetin e shtetit.
Kuvendi i Shqipërisë ka konfirmuar se ky kabinet nuk është më në detyrë dhe do të zëvendësohet nga stafi i ri i Niko Peleshi.
👉 Lista e plotë e stafit të ish-kryetares Spiropali:
Evis Fico – Shefe kabineti
Zhaklina Gjolla – Zëdhënëse
Boralda Lalollari – Këshilltare
Glen Mebelli – Këshilltar
Knut Fleckenstein – Këshilltar
Kosta Barjaba – Këshilltar
Ejona Isufaj – Këshilltare
Edon Beci – Këshilltar
Enilda Miftari – Këshilltare e jashtme
Liridona Limani – Këshilltare e jashtme
Erisjan Bregu – Sekretar
Danja Peza – Sekretare
Miranda Lila – Eksperte
Lidiana Dushku – Eksperte
Sadi Vorpsi – Ekspert
Megi Zonja – Eksperte e jashtme
Lorenc Vangjeli – Ekspert i jashtëm
2 pozicione eksperti vakant
Ky publikim ka hapur sërish debatin mbi mënyrën se si kabinetet politike përdoren si vendparkime për militantë, miq dhe personazhe publikë, duke u paguar për punë që askush nuk e di nëse janë bërë ndonjëherë.
