Dhoma Vendore e Avokatisë në Vlorë ka ngritur akuza të forta ndaj Drejtorisë Vendore të Agjencisë Shtetërore të Kadastrës Vlorë, duke e cilësuar atë si një “vatër abuzimi dhe keqmenaxhimi”. Në një reagim zyrtar, avokatët kërkojnë nga SPAK dhe prokuroritë kompetente nisjen e hetimeve për dyshime të rënda mbi veprime të paligjshme dhe korrupsion.
Në dokumentin e firmosur nga Dhoma e Avokatisë, theksohet se:
Kadastra e Vlorës ka kthyer qytetarët dhe bizneset në viktima të vonesave të pajustifikuara dhe praktikave të dyshimta;
Është minuar rëndë siguria juridike dhe e drejta e pronës;
Ekzistojnë dyshime për shpërdorim detyre, korrupsion pasiv dhe aktiv, si dhe pengim të drejtësisë.
Avokatët kërkojnë ndërhyrje urgjente nga drejtuesit qendrorë të Agjencisë së Kadastrës për të ndalur menjëherë abuzimet, si dhe nga Prokuroria e Vlorës për të nisur hetime penale. Në të njëjtën kohë, ata i bëjnë thirrje SPAK-ut të marrë në dorë çështjen për të garantuar hetim të plotë ndaj çdo zyrtari të përfshirë.
Dhoma e Avokatisë paralajmëron se do të ndjekë nga afër procesin dhe, nëse institucionet dështojnë të veprojnë, do të përdorë çdo mjet ligjor dhe ndërkombëtar për të mbrojtur të drejtat e qytetarëve.
Ky reagim vjen në një kohë kur problemet me pronat dhe shërbimet e kadastrës në Vlorë janë kthyer në një burim të vazhdueshëm konfliktesh dhe ankesash nga qytetarët, duke rritur presionin mbi institucionet për transparencë dhe llogaridhënie.
