Banka Amerikane e Investimeve (ABI Bank) po futet zyrtarisht në biznesin e ndërtimit, duke kaluar nga kredidhënia tek zhvillimi i resorteve turistike. Dy muaj më parë, kjo bankë themeloi një shoqëri të re komandite me emrin “BAY VIEW ALTERNATIVE INVESTMENT FUND”, e cila do të ndërtojë një resort në një sipërfaqe prej 32 hektarësh në zonën bregdetare të Poros, në Vlorë.
Dokumentet tregojnë se shoqëria e re ka një kapital prej 10.6 milionë euro, ku 99.3% zotërohet nga ABI Bank dhe pjesa tjetër nga drejtuesi i saj, Andi Ballta. Aseti kryesor i këtij kapitali është pikërisht toka 32 hektarëshe, e siguruar nga ekzekutimi i kolateraleve të kredive të këqija. Pra, ajo që dikur ishte kolateral për hua të pashlyera, sot do të shndërrohet në resort turistik.
Shoqëritë komandite (SIK) funksionojnë si fonde investimesh alternative, të regjistruara pranë Autoritetit të Mbikëqyrjes Financiare, dhe u ofrohen vetëm investitorëve profesionistë. Në këtë rast, ABI Bank është ortaku kryesor me përgjegjësi të pakufizuar, ndërsa ortakë të tjerë mund të bashkohen duke kontribuar me kapital shtesë për zhvillimin e projektit.
Ky nuk është rasti i parë që ABI Bank diversifikohet jashtë sektorit bankar. Vetëm pak muaj më parë, në maj, ajo bleu 10% të aksioneve të Premier Group – kompania e njohur e turizmit me aksioner kryesor Enver Mehmeti – për një çmim prej 363 mijë eurosh. Paralelisht, banka i ka dhënë Premier Group një financim prej 16 milionë eurosh për ndërtimin e hoteleve të reja, duke vendosur blerjen e aksioneve si garanci shtesë për kthimin e kredisë. Mehmeti ruan të drejtën e riblerjes së 10% të aksioneve pas shlyerjes së një pjese të detyrimeve.
Kjo lëvizje tregon një tendencë të re në Shqipëri: epidemia e ndërtimit ka përfshirë jo vetëm biznesmenët dhe politikanët, por tani edhe bankat, të cilat përveç financimeve po futen drejtpërdrejt në sektorin e turizmit dhe ndërtimit.
