Këtë javë në redaksinë tonë kanë mbërritur me dhjetra denoncime për derdhjen e ujërave të zeza direkt në det, veçanërisht në zonën e Golemit, Qerretit dhe Kavajës. Duket se disa biznese, në marrëveshje të heshtur me autoritetet vendore, po shmangin ndëshkimet duke shkarkuar ujërat e ndotura në të njëjtin det ku lahen pushuesit.
Pamjet e siguruara tregojnë një tub kanalizimesh që derdh ujërat e zeza në një kanal të hapur buzë detit, i cili më pas i çon ato drejt bregut. Qytetarët shprehen të alarmuar nga kjo situatë e përsëritur, sidomos duke pasur parasysh që sezoni turistik ende nuk ka përfunduar dhe plazhet vazhdojnë të frekuentohen.
Një denoncues shkruan: “Përshëndetje JOQ! Dua të denoncoj këtë masakër mjedisore në Golem, pranë ‘Miami 2 Hotel’, ku ujërat e zeza derdhen në det. Para një jave kanali ishte i mbyllur, ndërsa tani është hapur sërish.”
Pamjet flasin vetë, jo vetëm që po ndotet bregdeti me shkarkime të paligjshme, por vihet re edhe mungesa e plotë e veprimit nga inspektoratet përgjegjëse, të cilat sipas qytetarëve, po bëjnë “dy sy qorr e dy veshë shurdhë”.
