Gazeta prestigjioze zvicerane Neue Zürcher Zeitung i ka kushtuar një artikull kritik ndalimit të TikTok në Shqipëri, duke e konsideruar këtë vendim si pjesë të një projekti personal të kryeministrit Edi Rama për të përdorur Shqipërinë si “laborator testimi për masa politike kontraverse”. Sipas medias zvicerane, ndalimi u bë me justifikimin për të ndalur dhunën mes të rinjve, por vetë platforma TikTok e hodhi poshtë këtë pretendim, duke deklaruar se adoleshentët e përfshirë në incidentin tragjik nuk kishin llogari në TikTok.
NZZ thekson se ndalimi i TikTok nuk ka pasur asnjë efekt real, pasi përdoruesit shqiptarë kanë gjetur mënyra për të hyrë në platformë përmes VPN-ve, me një rritje rekord prej 1200% në përdorimin e tyre. Madje, qeveria vetë nuk e ka zbatuar me serioz vendimin, pasi edhe figura të larta të Partisë Socialiste, si kryebashkiaku i arrestuar i Tiranës Erion Veliaj, vazhdojnë të postojnë aktivisht në TikTok. Kjo, sipas gazetës, tregon se ndalimi ishte një veprim propagandistik për të larguar vëmendjen nga skandalet e brendshme, përfshirë korrupsionin.
Artikulli vë në dukje se Edi Rama po eksperimenton me masa politike të paprecedenta për të tërhequr vëmendjen e BE-së dhe për të forcuar pozicionin e tij ndërkombëtar. Këtu përfshihen jo vetëm ndalimi i TikTok, por edhe ide si ministri e kontrolluar nga inteligjenca artificiale, shoqëri pa para fizike, dhe qendrat e debatueshme të deportimit për azilkërkuesit. Sipas ekspertëve të cituar në shkrim, këto iniciativa kanë më shumë lidhje me imazhin personal të Ramës sesa me interesin publik të qytetarëve shqiptarë.
