Një 32-vjeçar shqiptar në Angli është kapur nga policia si pjesë e një ferme kanabisi në Norfolk, falë… një furçe dhëmbësh.
Meardo Kokomani, i cili punonte ditën si lavazhier makinash në Kembrixh, u kap nga policia pranë një prone në Terrington St John, ku po kultivohej drogë. Në bastisjen e kryer në qershor 2023, oficerët gjetën vetëm dy bimë kanabisi, por edhe 110 fidanë dhe pajisje për kultivimin e tyre.
Hetimi mori drejtim vendimtar pasi ekspertët mjeko-ligjorë analizuan një furçë dhëmbësh të gjetur në pronë, e cila tregoi qartë se Kokomani kishte qëndruar aty. Përveç kësaj, atij iu gjetën edhe 605 paund cash.
Në seancën e zhvilluar në Gjykatën e Kurorës së Norwich, Kokomani pranoi akuzën për prodhim të kanabisit. Gjyqtari Shaw e dënoi me një urdhër dyvjeçar për punë në komunitet, ku përfshihet edhe 80 orë punë e papaguar.
Nga lavazhi i makinave te “shtëpia bari”, rasti i Kokomanit është shembulli tipik i mënyrës sesi policia britanike përdor edhe detajet më të vogla – në këtë rast një furçë dhëmbësh – për të zbuluar lidhjet e të pandehurve me veprimtari kriminale.
