Presidentja e Parlamentit Europian, Roberta Metsola, ka refuzuar kërkesën për të mbajtur një minutë heshtje në nder të aktivistit konservator amerikan Charlie Kirk, i vrarë të mërkurën gjatë një fjalimi në Universitetin e Utah.
Propozimi u paraqit nga eurodeputeti konservator Charlie Weimers (ECR), i cili e cilësoi si një gjest simbolik në mbrojtje të lirisë së fjalës. Por Metsola e hodhi poshtë, duke theksuar se minuta të tilla heshtjeje shpallen vetëm në fillim të seancave plenare dhe vetëm me kërkesë zyrtare nga grupet politike.
Weimers tentoi të shfrytëzonte kohën e tij për të mbajtur një homazh në heshtje, por nënkryetarja Katarina Barley e ndërpreu, duke shkaktuar protesta nga eurodeputetët e djathtë që goditën karriget dhe brohoritën.
Ky vendim u përshëndet me duartrokitje nga deputetët e qendrës së majtë dhe liberalët, ndërsa grupet e tjera theksuan se përgjegjësia i takonte Presidencës së Parlamentit.
