Për herë të parë, numri i fëmijëve dhe adoleshentëve obezë ka tejkaluar atë të atyre nënpeshë, sipas një raporti të fundit nga UNICEF, agjenci e OKB-së për fëmijët.
Të dhënat globale tregojnë se rreth një në dhjetë fëmijë të moshës 5-19 vjeç, rreth 188 milionë në total, janë aktualisht obezë. Ndërkohë, numri i fëmijëve nën peshë në të njëjtën grupmoshë ka rënë në 9.2%, nga gati 13% në vitin 2000.
UNICEF e lidh këtë rritje alarmante me zëvendësimin e dietave tradicionale me ushqime ultra të përpunuara, të lira, por të pasura me sheqer, kripë, yndyrna të pashëndetshme dhe aditivë.
“Kequshqyerja nuk nënkupton më vetëm mungesë ushqimi, por edhe tepricë të kalorive të gabuara që sjellin obezitet,” – tha Catherine Russell, drejtoresha ekzekutive e UNICEF.
UNICEF po u bën thirrje qeverive të mbrojnë dietat e fëmijëve nga përbërësit e pashëndetshëm dhe të ndalojnë industrinë ushqimore të përpunuar nga ndërhyrja në vendimet politike.
Kur ekspertët e shëndetit i referoheshin fëmijëve të kequshqyer, kjo shpesh lexohej si ata që ishin nën peshë. Por jo më, pasi ky term tani i referohet edhe ndikimit të obezitetit në shëndetin dhe zhvillimin e fëmijëve. Edhe në vendet më të varfra kjo është tani një shqetësim i vërtetë.
Fëmijët konsiderohen mbipeshë kur janë dukshëm më të rëndë se një peshë e shëndetshme për moshën, seksin dhe gjatësinë e tyre. Obeziteti është një formë e rëndë e mbipeshës dhe lidhet me një rrezik më të lartë të diabetit të tipit 2, sëmundjeve kardiovaskulare dhe disa llojeve të kancerit, në jetën e mëvonshme.
Gjatë gjithë fëmijërisë, ushqyerja e mirë, duke përfshirë shumë fruta, perime dhe proteina, luan një rol jetësor në rritje, zhvillim kognitiv dhe shëndet mendor. Por shumë dieta tradicionale po zëvendësohen nga ushqime ultra të përpunuara, shpesh të pasura me sheqer, niseshte, kripë, yndyrna të pashëndetshme dhe aditivë.
UNICEF-i paralajmëron se ndikimet shëndetësore dhe kostot ekonomike të mosbërjes asgjë janë potencialisht të mëdha. Raporti vlerëson se deri në vitin 2035, ndikimi ekonomik global i mbipeshës dhe obezitetit pritet të kalojë 4 trilionë dollarë amerikanë (2.95 trilionë paund) në vit.
