Është zbuluar shkaku i gjendjes së rënduar shëndetësore që çoi me urgjencë në QSUT mbrëmjen e së shtunës bashkëpunëtorin e drejtësisë, Nuredin Dumani.
Fillimisht dyshimet e para ishin për një rast helmimi, por pas një sërë ekzaminimesh mjekësore, u konstatua se bëhej fjalë për një krizë epileptike, e cila shkaktoi komplikacione të përkohshme në gjendjen e tij.
Pas trajtimit në Qendrën Spitalore Universitare “Nënë Tereza” dhe përmirësimit të parametrave shëndetësorë, Dumani është larguar nga ambientet e spitalit dhe aktualisht ndodhet i rikthyer në Institutin e Ekzekutimit të Vendimeve Penale 313.
Mjekët konfirmuan se gjendja e tij nuk paraqet më rrezik për jetën dhe se ai është nën kujdesin e duhur mjekësor.
Gjatë gjithë së shtunës, Dumani ka qenë nën monitorim të vazhdueshëm nga autoritetet dhe prokuroria e posaçme, për shkak të statusit të tij si bashkëpunëtor i drejtësisë në disa çështje të bujshme kriminale.
