Një konflikt i çastit mes dy të rinjve ka përfunduar me të shtëna armësh në zonën e Hamallaj, Fermë Sukth, Durrës. Policia ka arrestuar në flagrancë 27-vjeçarin Sebastian Toska, i cili pas një sherri verbal me një 34-vjeçar, ka qëlluar në drejtim të tij me një armë gjahu. Fatmirësisht, nga incidenti nuk pati persona të lënduar.
Ngjarja alarmoi banorët e zonës, ndërsa Policia e Shijakut, në bashkëpunim me strukturat hetimore të DVP Durrës, organizoi operacionin e koduar “Shotgun” që çoi në kapjen e autorit. Gjatë kontrollit, u sekuestrua edhe çifta që u përdor në përplasjen e armatosur, armë të cilën i riu e mbante pa leje.
Sebastian Toska do të përballet me disa akuza të rënda, përfshirë “vrasje e mbetur në tentativë”, “prishje e rendit publik” dhe “armëmbajtje pa leje”. Policia ka bërë thirrje për shmangien e konflikteve të dhunshme dhe për dorëzimin e armëve të mbajtura në mënyrë të paligjshme. Hetimet për rrethanat e ngjarjes vijojnë.
