Aeroporti i Vlorës, i cili pritej të hapej sipas premtimit të kryeministrit Edi Rama për këtë sezon turistik, është zhytur në një krizë të re menaxheriale dhe aksionare.
Biznesmeni shqiptar i Kosovës Behgjet Pacolli ka marrë vendimin të shkarkojë administratorin e shoqërisë koncesionare Vlora International Airport, Valon Lluka. Lëvizja u bë dy ditë më parë, në mënyrë të njëanshme dhe vetëm me votat e kompanisë së tij Mabco Construction. Aksioneri i minorancës, 2A Group, nuk ka qenë i pranishëm në mbledhje.
Përplasjet mes aksionerëve kanë marrë dhenë publikisht. 2A Group, që zyrtarisht zotëron vetëm 2% të aksioneve, pretendon se në bazë të një marrëveshjeje të vitit 2022 i takojnë plot 47%. Dokumenti ka hedhur dritë mbi marrëveshje të fshehta mes palëve, të cilat Mabco Construction nuk i njeh duke këmbëngulur se kontrollon 98% të aksioneve.
Fillimisht, Pacolli u përpoq të rrëzonte pretendimet e skandalit të bërë publik, por vetëm pak kohë më vonë, aksioneri i minorancës Valon Ademi e akuzoi hapur për mashtrim.
Nuk është e qartë nëse shkarkimi i Llukës lidhet drejtpërdrejt me konfliktin e hapur mes dy palëve, por tensionet duket se kanë krijuar një krizë të thellë mes aksionerësh në projektin e aeroportit të Vlorës.
