Teksa të hënën pritet nisja e vitit të ri shkollor 2025-2026, shkollat po shpërndajnë libra falas për familjen në pamundësi ekonomike, si një lehtësim financiar për fëmijët e tyre që ndjekin arsimin.
Një qytetare shkoi sot në shkollën 9-vjeçare “Musa Çakërri” në Vlorë, për të marrë librat e fëmijës së saj që këtë vit ndjek klasën e shtatë. Mirëpo ajo ka mbetur e shokuar nga gjendja në të cilën librat iu dorëzuan.
“Shiko çfarë librash, copë-copë! Pa kapakë, të shkarravitur! Këtu do mësojnë fëmijët?” thotë ajo në një video dërguar redaksisë sonë.
Në pamje duken librat të cilët nuk janë në formën e tyre më të mirë, ku sipas qytetares, përveç shkarravitjes dhe mungesës së kapakëve, librat kanë dhe mungesë të faqeve të mësimit. Kjo krijon mangësi në marrjen e mësimeve të plota për nxënësit.
Denoncuesia tregon se është në gjendje të vështirë ekonomike, dhe librat falas do të ishin një lehtësim goxha i madh për të, por në këtë gjendje, ajo është e detyruar që të marrë para borxh për t’i blerë të rinj.
“Ju e dini gjendjen time sepse kam bërë apel për shtëpinë më parë te ju. Unë nuk kam mundësi ekonomike, librat janë lehtësim, por këto janë copë-copë. Do detyrohem të marr lekë borxh që të ble të tjera për dalin,” tha ajo në një bisedë telefonike.
Përgjegjësia fillon që te përdorimi i librave nga nxënësit, të cilët nuk duhet t’i dëmtojnë pasi në fund të vitit duhet të dorëzohen përsëri të rregullt. E në rastin e këtyre librave që janë dorëzuar të grisur dhe të papërdorshëm, përgjegjësia bie mbi pranuesit e tyre, të cilët i kanë rimarrë në shkollë në përfundim të vitit arsimor edhe pse në këtë gjendje.
