Një turist i huaj ka ndarë në rrjetet sociale përvojën e tij në stacionin qendror të autobusëve në Tiranë, duke e përshkruar si një nga sistemet më konfuz të transportit publik në Evropë. Blogeri i huaj vë në pah problemet si mungesë informacioni dhe autobusë që nisen pa asnjë paralajmërim të qartë.
Në videon e postuar, ai shkruan: “POV: Je në stacionin kryesor të autobusëve në Tiranë, është 35°C, dhe je gati të hysh në sistemin më konfuz dhe kaotik të transportit publik në Evropë.” Turisti duket i hutuar, duke e pasqyruar përmes videos konfuzionin dhe pasigurinë që ka përjetuar gjatë përpjekjes për të gjetur autobusët e duhur.
Reagimi i tij ka tërhequr vëmendje të madhe online. Videoja e tij është bërë virale në TikTok dhe Instagram, duke nxjerrë në pah një nga sfidat më të mëdha për udhëtarët e huaj që vizitojnë Tiranën, por jo vetëm pasi problem është edhe për vetë shqiptarët.
