Në Gjimnazin Dalton në Alsdorf të Gjermanisë, që nga fundi i prillit, telefonat celularë janë ndaluar rreptësisht gjatë gjithë ditës shkollore. Iniciativa, pjesë e projektit "Të Mençur pa Telefona", ka sjellë ndryshime të dukshme në sjelljen e nxënësve më pak shpërqendrim, më shumë ndërveprim social dhe lojëra në oborrin e shkollës. Sipas Klara Ptak, përfaqësuese e nxënësve, ndalimi në fillim hasi në skepticizëm, por shumë nxënës, veçanërisht ata më të vegjlit, tashmë e shohin pozitivisht këtë masë. Drejtori i shkollës, Martin Wieler, e vlerëson projektin si një sukses, duke theksuar se 90% e mësuesve dhe 85% e prindërve e mbështesin vendimin.
Ndërkohë, në qytetin Solingen, është ndërmarrë një hap edhe më radikal: ndalimi i përdorimit të mediave sociale për nxënësit e klasës së pestë, jo vetëm në shkollë, por edhe në shtëpi. Projekti mbështetet nga një marrëveshje vullnetare mes prindërve, nxënësve dhe mësuesve dhe synon të reduktojë ndikimin negativ të rrjeteve sociale tek fëmijët e vegjël. Nismëtarët argumentojnë se vetëm me një qasje të bashkërenduar shoqërore mund të shmangen ndjenjat e izolimit tek fëmijët që përndryshe do të ndiheshin të përjashtuar nëse nuk kishin akses në këto platforma.
Debati për ndalimin e telefonave në shkolla mbetet i nxehtë në Gjermani. Ndërsa Akademia Leopoldina dhe disa autoritete publike kërkojnë kufizime të qarta sipas moshës, Konferenca Federale e Nxënësve thekson rëndësinë e edukimit mediatik, jo ndalimeve të përgjithshme. Megjithatë, si prindërit ashtu edhe shkollat po kërkojnë zgjidhje të balancuara që mbrojnë mirëqenien e fëmijëve pa i shkëputur ata nga realiteti i shoqërisë dixhitale.
