Policia e Durrësit ka dhënë sot detaje lidhur me një ngjarje të ndodhur disa ditë më parë në lagjen nr.13 të qytetit bregdetar, ku u dhunua një turist me shtetësi austriake, por me origjinë rumune.
Sipas njoftimit, shtetasi i huaj A.D. është paraqitur mbrëmjen e 14 gushtit në Stacionin e Policisë Plazh, duke kallëzuar se rreth orës 15:30 ishte sulmuar nga pesë persona për motive të dobëta.
Pas veprimeve hetimore, policia ka identifikuar dhe shoqëruar dy adoleshentë 17-vjeçarë, të cilët dyshohet se kanë qenë të përfshirë në dhunimin e turistit. Në përfundim të procedurave, pas konsultimit me prokurorin, ndaj tyre ka nisur procedimi në gjendje të lirë për veprën penale “Dëmtime të tjera me dashje”.
Ndërkohë, hetimet vijojnë për të identifikuar edhe personat e tjerë të dyshuar si pjesë e ngjarjes, me qëllim vënien e tyre përpara përgjegjësisë ligjore.
