Mungesa e ilaçeve vijon të rrezikojë jetën e pacientëve në vendin tonë, ndërsa ata dhe familjarët e tyre shpesh nuk dinë si të veprojnë përballë kësaj situate të paprecedentë.
Së fundmi, pranë redaksisë sonë ka mbërritur një denoncim për mungesën e medikamentit “Tenofovir disoproxil Mylan 245 mg”, i cili përdoret për trajtimin e sëmundjeve të mëlçisë.
Sipas një qytetari, pacientët që vuajnë nga cirroza, mes tyre edhe babai i tij, nuk po arrijnë të sigurojnë dot këtë ilaç jetik për trajtimin e sëmundjes.
“Kanë ngelur pa ilaçe që janë shumë të rëndësishme për shëndetin e pacientëve, pasi nëse nuk i marrin, shëndeti i tyre kompleksohet,” shkruan denoncuesi.
Ai shton se e kanë kërkuar në shumë farmaci, por askund nuk e kanë gjetur: “Është një ilaç që duhet ta sigurojë shteti, sepse nuk gjendet. Edhe në Itali apo vende të tjera nuk ta japin pa kartën e shëndetit ose pa vendimin e mjekut.”
Të gjendur në këtë situatë, pacientët dhe familjarët e tyre i bëjnë thirrje institucioneve përgjegjëse të ndërhyjnë sa më shpejt, për të garantuar furnizimin me medikamente dhe trajtimin e rregullt të sëmundjeve që rrezikojnë jetën e tyre.
Më poshtë denoncimi i plotë:
“Përshëndetje JOQ, doja të bëja një denoncim për të sëmurët me mëlçi, cerozë, ndër to dhe babi im.
Ata kanë ngelur pa ilaçe të cilat janë të rëndësishme për shëndetin e pacientëve, pasi nëse nuk i marrin, u kompleksohet shëndeti. Kur shkojnë në farmaci, të gjitha thonë ka mungesë dhe nuk ka furnizim.
Çfarë duhet të bëjnë të sëmurët ndërkohë? Është një ilaç i cili duhet ta japë shteti se nuk gjendet, dhe në Itali apo vende të tjera, pa karëtë shëndeti dhe vendimin e doktorit.”
