Kombëtarja shqiptare ka nisur grumbullimin për ndeshjet e muajit shtator me disa ndryshime të rëndësishme në listën e lojtarëve. Federata Shqiptare e Futbollit (FSHF) ka njoftuar zyrtarisht se janë bërë tre zëvendësime në përbërje, për shkak të dëmtimeve dhe një largimi surprizë.
Mes të dëmtuarve që nuk do të jenë pjesë e kësaj përballe janë mesfushori Ylber Ramadani dhe sulmuesi Ernest Muçi, të cilët janë detyruar të mungojnë për shkak të problemeve fizike.
Por ajo që bie më shumë në sy është largimi i mbrojtësit Adrian Bajrami nga kuqezinjtë. Sipas FSHF-së, lojtari ka zgjedhur të përfaqësojë Zvicrën në të ardhmen, duke u larguar kështu përfundimisht nga Kombëtarja shqiptare. Bajrami kishte zhvilluar më parë vetëm tre ndeshje miqësore me Shqipërinë, në kohën kur ekipi drejtohej nga Edi Reja.
Në vend të tyre, janë ftuar tre emra të rinj: Kristian Shpendi, Enis Çokaj dhe Maldini Kaçurri. Ky i fundit përbën një risi në listën kuqezi dhe pritet të ketë mundësinë të debutojë nën drejtimin e Sylvinhos.
Këto ndryshime vijnë në një moment të rëndësishëm për Kombëtaren, që po përgatitet për sfidën me Gjibraltarin dhe atë me Letoninë, ndërsa kërkon të ruajë vazhdimësinë pozitive në rrugëtimin ndërkombëtar.
