Më 24 korrik, JOQ Albania në bashkëpunim me TVA News publikoi historinë tronditëse të një vajze kolumbiane, e trafikuar për prostitucion në Elbasan. Pasi u arrestua nga policia dhe iu konfiskuan sendet personale, vajza u gjend përballë një abuzimi edhe më të madh, prokurori i çështjes, në vend që t’i kthente sendet pas lirimit, i kërkoi të vazhdonte të punonte për të. E vendosur t’i japë fund këtij ferri, vajza refuzoi dhe shprehu vetëm një dëshirë të kthehej në vendin e saj për t’u ribashkuar me familjen.
E gjendur mes dhunës së heshtur të pushtetarëve dhe mungesës së rrugëdaljes, ajo vendosi t’i drejtohej JOQ Albania. Përmes një videomesazhi, , vajza denoncoi publikisht rastin. Reagimi ishte i menjëhershëm: qytetarët dhe komuniteti u angazhuan, ndërsa një ditë pas publikimit, Sidorela anëtare e një shoqate që ndihmon falas persona të margjinalizuar kontaktoi redaksinë dhe mori përsipër të siguronte kthimin e saj në Kolumbi.
Falë këtij bashkëpunimi dhe solidaritetit qytetar, vetëm një muaj më vonë, vajza ka mundur të kthehet në vendlindje dhe të rifillojë jetën pranë familjes së saj.
