Një aksident automobilistik është regjistruar mbrëmjen e sotme në kryqëzimin e Ishull-Shëngjinit, në Lezhë.
Si pasojë e ngjarjes kanë mbetur të plagosur tre persona, të cilët janë transportuar drejt Spitalit të Traumës në Tiranë për të marrë ndihmën e nevojshme mjekësore.
Sipas policisë, njëri prej mjeteve drejtohej nga shtetasi R.D., ndërsa makina tjetër e përfshirë në aksident drejtohej nga shtetasi F.P.
Ende nuk ka informacion mbi gjendjen e tyre shëndetësore.
Siç shihet dhe në foto, nga përplasja mes dy automjeteve, një prej tyre ka përfunduar i përmbysur në një parcelë pranë rrugës.
Njoftimi i policisë:
Lezhë/Informacion paraprak
Rreth orës 19:40, në aksin rrugor “Lezhë–Milot”, automjeti me drejtues shtetasin R. D. është përplasur me automjetin që drejtohej nga shtetasi F. P.
Si pasojë e aksidentit kanë mbetur të dëmtuar pasagjeri në automjetin e shtetasit R. D., shtetasi M. V., si dhe të dy drejtuesit e automjeteve. Të tre të dëmtuarit janë transportuar në Spitalin e Traumës, Tiranë, për ndihmë më të specializuar mjekësore.
Grupi hetimor ndodhet në vendngjarje dhe po punon për sqarimin e rrethanave dhe shkaqeve të aksidentit.
