Një video e mbërritur në redaksinë e JOQ Albania tregon shpirtin e palëkundur të humorit të një qytetari nga Vlora, i cili ka gjetur një mënyrë të veçantë për të reaguar ndaj përmbytjeve. Ndërsa uji i arrin deri në gju, ai qëndron i qetë me biçikletën e tij në mes të rrugës, duke i sfiduar përmbytjet me një këngë.
Teksti i këngës është një ironi e drejtpërdrejtë ndaj kryebashkiakut të qytetit, Ermal Dredha. Me zë të lartë dhe plot pasion, ai këndon: "Për Ermalin kënga këndon!". Videoja, që fillimisht duket si një moment humori, shndërrohet shpejt në një apel të qartë dhe të fortë.
Pasi përfundon së kënduari, qytetari i drejtohet Dredhës me fjalët: "O kryetar i bashkisë, të lutem, zgjidheni urgjentisht këtë punë, se u vajti vite!"
Ky mesazh i drejtpërdrejtë, i shoqëruar me ironinë e këngës, bëhet simbol i pakënaqësisë së qytetarëve që çdo vit përballen me të njëjtin problem. Ai përfundon apelin me një mesazh tjetër të rëndësishëm: "Vlora ka qenë dhe do të mbetet vendi i turistëve, vendi i njerëzve të dashur dhe të mirë!"
