Rastet e shumta të raportuara dhe të denoncuara pranë redaksisë sonë duket se tashmë kanë arritur të tërheqin vëmendjen e gjithkujt madje edhe të atyre që mund të japin një zgjidhje.
Nga nuskat e fshehura pranë banesave e deri tek ato me pasoja fatale , qytetarët kanë dërguar histori tronditëse që tregojnë se fenomeni i magjive është ende shumë i pranishëm në realitetin shqiptar. Kujtojmë rastin e fundit në Shkodër, ku një e moshuar u kap duke hedhur dhè të zi para derës së fqinjës. Prej atij momenti, familja e saj raportoi ngjarje të rënda, mes tyre një aksident me motor ku mbeti i plagosur rëndë vëllai i denoncueses.
Një tjetër episod i bujshëm ishte ai i lopës që ngordhi në çast, pas një magjie të hedhur pranë. Pamjet e publikuara në JOQ tronditën opinionin publik dhe ndezën debat të madh mes qytetarëve.
Këto raste duket se kanë mbërritur edhe në veshët e hoxhë Ahmed Kalasë, imamit të xhamisë “Dine Hoxha”. Teksa lexonte një mesazh mbi një tjetër rast me nuska, përgjigja e tij ishte e prerë: “Vendos kamera dhe nxirri te JOQ, tjetër zgjidhje nuk ka.”
Dhe ndoshta ky është mesazhi më i qartë për të gjithë: errësira humbet forcën vetëm kur nxirret në dritë. Çdo akt i fshehtë, çdo dorë që synon të dëmtojë të tjerët , e ka vendin përballë syve të shoqërisë.
