Petrit Hajdari emërohet ushtrues detyre i kryetarit të Degës së PDK-së në Drenas.
Partia Demokratike e Kosovës në mbledhjen e rregullt të kryesisë së saj, përveç shqyrtimit të zhvillimeve politike në vend, ka diskutuar edhe për dinamizimin e përgatitjeve për zgjedhjet lokale të 12 tetorit.
Në këtë kuadër, në bazë të statutit të partisë, kryesia e PDK-së ka emëruar strukturat udhëheqëse të përkohshme të Degës së Drenasit, kryesinë e re të saj, duke i dhënë kompetencat për të plotësuar edhe strukturat në nivel të nëndegëve. Me unanimitet të plotë, Petrit Hajdari është emëruar ushtrues detyre i kryetarit të kësaj dege, duke marrë besimin e kryesisë për të udhëhequr proceset e radhës.
Partia Demokratike e Kosovës hyn në këto zgjedhje me vizion të qartë: fitore bindëse në komunat ku qeverisim, fitore të reja në komuna të tjera dhe modelim të një qeverisjeje më të mirë, me qytetarin në qendër.
PDK mbetet e përkushtuar që përmes përfaqësuesve të saj të garantojë qeverisje efikase, zhvillim të qëndrueshëm dhe mirëqenie të shtuar për qytetarët, duke dëshmuar se është model i përgjegjshëm i menaxhimit lokal dhe alternativë moderne për të ardhmen e komunave të Kosovës.
