Një qytetar që ditën e djeshme ka vizituar Parkun Kombëtar të Butrintit ka ngritur shqetësimin për ndotjen e ujërave në zonën arkeologjike, duke nisur që nga pjesa e jashtme dhe deri tek amfiteatri antik, një nga atraksionet kryesore të parkut.
Sipas denoncimit të bërë përmes redaksisë sonë, vizitori përshkruan gjendjen e parkut ku pjesa e jashtme është e mbushur me shishe plastike dhe mbeturina, shoqëruar me një erë të pakëndshme, ndërsa niveli dhe cilësia e ujit pranë strukturave antike lë shumë për të dëshiruar.
Qytetari thotë se niveli i ujit nuk është i qëndrueshëm, por një mirëmbajtje minimale sezonale do ta përmirësonte ndjeshëm situatën dhe imazhin që jep te turistët vendas dhe të huaj.
Parku i Butrintit, pjesë e trashëgimisë botërore të UNESCO-s, është një nga destinacionet më të rëndësishme turistike dhe kulturore në Shqipëri, prandaj menaxhimi i mbetjeve, mirëmbajtja e mjedisit dhe mbrojtja e pasurisë arkeologjike janë jetike për ruajtjen e këtij thesari kombëtar.
Qytetari u bën thirrje institucioneve përgjegjëse, përfshirë Administratën e Zonave të Mbrojtura dhe bashkinë Sarandë , që të marrin në konsideratë këtë shqetësim dhe të ndërhyjnë me masa të menjëhershme për pastrim dhe mirëmbajtje.
Denoncimi i qytetarit:
Pershendetje, Ju shkruaj sepse vizitova sot parkun e Butrintit dhe kjo ishte gjendja e ujerave duke filluar qe nga pjesa e jashtme plot me shishe plastike dhe ere te pakendshme e duke vazhduar brenda me ujin sidomos te pjesa e anfiteatrit. Kuptoj qe eshte liqeni dhe niveli i ujit nuk eshte i qendrueshem brenda qytetit antik por nje mirembajtje minimale sezonale besoj se do e permiresonte situaten. Shpresoj qe nepermjet faqes tuaj problematika te shihet nga personat perkates. Faleminderit.
