Një situatë absurde është regjistruar pas mesnate, në Palasë, ku dy qytetarë kanë shkuar për të bërë një denoncim pranë postës së policisë.
Ngjarja ka ndodhur rreth orës 00:20, ku qytetarët thonë se pas 45 minutash pritjeje, nuk gjetën askënd në postën e policisë, gjë e cila është e provuar nga pamjet e mbërritura në redaksinë tonë.
Sipas denoncimit, qytetarët telefonuan disa herë policinë dhe iu tha që të prisnin. Pas disa minutash, në vendngjarje mbërriti një person që u prezantua si polic, por i veshur me rroba plazhi dhe shapka me gisht.
Qytetarët nuk e pranuan këtë mënyrë, duke i thënë se nuk kishte asnjë garanci që ai ishte efektiv policie, pasi nuk kishte uniformë e as mjet identifikimi.
“Ne kemi 45 minuta që presim këtu dhe na vjen ti me rroba plazhi, me shapka dhe na thua hajde këtej. Ç’punë ke ti me policinë? Policia e Shtetit vjen me rroba plazhi?!” – dëgjohet një qytetar duke i thënë.
Personi në fjalë pranoi se “nuk ishte në orar pune”, por ofroi ndihmë. Reagimi i qytetarëve ishte i ashpër: “Ku ta di unë se nuk je hajdut apo kriminel dhe do të më grabisësh apo vrasësh?!”
Denoncimi i qytetarëve ngre sërish pikëpyetje mbi shërbimin e policisë në zonat turistike dhe mbi seriozitetin e strukturave shtetërore, sidomos në periudhën kur vendi është i mbushur me turistë dhe siguria duhet të ishte prioritet.
Vlen të theksohet se nuk është hera e parë që kjo postë policore bëhet pjesë e denoncimeve publike. Vetëm një vit më parë, në qershor 2024, posta e policisë në Palasë u “shkri” pas një rasti të rëndë neglizhence, kur një efektiv nuk ndërhyri për të ndaluar dy persona që lundronin me jet ski në një zonë të ndaluar.
