Rusia goditi gjatë natës qytetin qendror të Ukrainës, Kremenchuk, duke shkaktuar një shtyllë të madhe tymi që u ngrit mbi qytet. Kryebashkiaku Vitalii Maletskyi tha se ky sulm tregon se presidenti rus Vladimir Putin nuk ka interes për paqe.
Sipas forcave ajrore ukrainase, kjo ishte goditja më e madhe e Rusisë në gusht. Ajo ndodhi vetëm disa orë pas samitit në Uashington, ku presidenti ukrainas Volodymyr Zelensky u takua me Donald Trump dhe liderët europianë.
Moska nisi 270 dronë dhe 10 raketa, nga të cilat Ukraina tha se rrëzoi 230, por 16 objektiva u goditën. Ministri i Jashtëm ukrainas Andrii Sybiha shkroi në X: “Ndërsa në Uashington punohej për paqen, Moska bëri të kundërtën, më shumë sulme dhe shkatërrim.”
Guvernatori i Poltavës tha se nuk pati viktima, por rreth 1500 familje mbetën pa energji elektrike. Ministria e Energjisë konfirmoi se u dëmtuan objekte energjetike, duke shkaktuar edhe një zjarr të madh.
Nga ana tjetër, Ministria ruse e Mbrojtjes deklaroi se ka goditur një rafineri nafte që furnizonte ushtrinë ukrainase, ndërsa akuzoi Kievin për një sulm me dronë ndaj rafinerive dhe një spitali në rajonin e Volgogradit.
Kryebashkiaku Maletskyi publikoi një foto ku shihet tymi i zi që mbulon qiellin e qytetit. Ai shtoi se dhjetëra shpërthime tronditën zonën, duke dëmtuar infrastrukturën energjetike dhe të transportit, si dhe paralajmëroi qytetarët të mos afrohen tek municionet e pashpërthyera që janë gjetur në qytet.
Po ashtu, një tjetër sulm me dronë në rajonin e Chernihivit la mbi 30 mijë familje pa energji elektrike.
