Në një artikull të fundit të publikuar nga The Telegraph, janë ngritur alarme për aktivitetet e bandës shqiptare të drogës, e udhëhequr nga Franc Çopja dhe Ervis Çela. Kjo bandë, e cilësuar si një nga sindikatat më të fuqishme të krimit në Evropë, ka pastruar miliarda euro nga aktivitetet e paligjshme, duke i fshirë ato nëpërmjet një perandorie të gjerë biznesi.
Nga pasuritë e paluajtshme, vilat, deri te një vendpushim turistik luksoz, grupi ka përdorur metoda të sofistikuara për të fshehur të ardhurat e saj, duke krijuar një sistem të lidhur ngushtë me tregun ndërkombëtar të drogës. Sipas artikullit, klani Çela-Çopja ka kontrolluar të gjithë zinxhirin e trafikimit të kokainës, nga prodhimi dhe transporti deri te shpërndarja e saj në tregjet evropiane.
Ata janë shprehur se kanë pasur ndikim të drejtpërdrejtë në çmimin e kokainës, ndërkohë që janë përfshirë edhe në pastrimin e parave, duke përdorur metoda të tilla si fshehja e kartëmonedhave nën rrënjët e ullinjve ose shndërrimi i parave në ari.
Autoritetet shqiptare, së bashku me agjencitë ndërkombëtare, kanë ndërhyrë duke sekuestruar pasuritë e bandës, përfshirë një resort luksoz në Shijak, si dhe shumë pasuri të tjera. Hetimet e nisura përmes platformës të koduar Sky ECC kanë zbuluar operacione të shumta të trafikut të drogës, përfshirë transportin e 28 ton kokainë nga Paraguai në Evropë, me vlerë disa miliardë paund.
Aktualisht, Franc Çopja dhe Ervis Çela ndodhen nën hetim dhe janë arrestuar, ndërsa prokurorët theksojnë se ky është një nga operacionet më të mëdha të zbuluara kundër bandave shqiptare që kontrollojnë tregun e kokainës në Evropë.
