Në ditën hapëse të Premier League, Anfield do të kthehet në një skenë të ndjerë homazhesh për Diogo Jotën, ish-yllin e Liverpoolit dhe të kombëtares portugeze, i cili ndërroi jetë tragjikisht më 3 korrik, në moshën 28-vjeçare.
Familja e tij gruaja, fëmijët dhe vëllai André Silva do të jetë e pranishme këtë të premte në stadium, për të ndjekur sfidën kundër Bournemouth dhe për të marrë dashurinë e komunitetit “Reds”.
Para fillimit të ndeshjes, ashtu si në të gjitha takimet e para të sezonit, do të mbahet një minutë heshtje. Në The Kop dhe në tribunën e Sir Kenny Dalglish është planifikuar një koreografi e veçantë në nder të tij, ndërsa tifozët do të shfaqin mbështetjen e tyre për familjen.
"Unë besoj se gruaja, fëmijët dhe familja e Diogos do të jenë në stadium dhe është e rëndësishme që ne, si klub, t'u tregojmë atyre se ata gjithmonë do të kenë dashurinë dhe mbështetjen tonë, ndërsa përballen me këtë situatë shumë tragjike. Ne jemi këtu për ta, gjithmonë", tha Arne Slot, siç citohet në programin zyrtar për ndeshjen e së premtes.
Jota kishte veshur fanellën e Liverpoolit që nga viti 2020, duke lënë gjurmë të thella në fushë dhe në zemrat e tifozëve.
