Dy avionë të kompanisë ajrore easyJet janë përplasur mes tyre mëngjesin e sotëm në pistën e aeroportit të Mançesterit, duke shkaktuar dëmtime në majat e krahëve të tyre.
Mediat britanike raportojnë se nuk ka pasur të lënduar, ndërsa autoritetet kanë nisur një hetim të menjëhershëm për ngjarjen. Incidenti ndodhi rreth orës 06:30, ndërsa të dy avionët po lëviznin drejt pistës për ngritje. Avionët e përfshirë ishin me destinacion Gjibraltarin dhe me destinacion Paris Charles de Gaulle.
Avionët u kthyen në zonën e parkimit dhe pasagjerët u zbarkuan të sigurt. Kompania njoftoi se janë vendosur avionë zëvendësues, ndërsa pasagjerëve u janë ofruar kuponë për pije freskuese gjatë pritjes.
Një pasagjere në fluturimin për në Gjibraltar, Tynisha Chaudhry, tha për BBC se goditja ishte e fortë dhe krahasohej me një “aksident me makinë”. Sipas saj, menjëherë pas përplasjes, në vendngjarje mbërritën disa mjete zjarrfikëse dhe ekipe sigurie.
Aeroporti i Mançesterit pezulloi operacionet për disa minuta për shkak të incidentit, por fluturimet u rikthyen në normalitet pas një kontrolli të shpejtë të situatës.
