JOQ Albania publikoi më herët pamjet dramatike të mbërritura në redaksi nga dhjetëra qytetarë të shqetësuar, të cilët kërkonin ndërhyrje urgjente nga shteti për t’i shpëtuar nga rreziku serioz që u kanosej prej flakëve.
Së fundmi, raportohet se situata në Delvinë vijon të jetë kritike. Zjarri ka përfshirë zona të gjera dhe i është afruar rrezikshëm spitalit të qytetit. Policia ka evakuuar banorët e lagjeve Llakë, Mukurs dhe Xhermëhallë, ku gratë, fëmijët dhe të moshuarit janë larguar nga shtëpitë, ndërsa burrat kanë mbetur në vend për të ndihmuar zjarrfikësit dhe punonjësit e emergjencës.
Qyteti është aktualisht pa energji elektrike, gjë që e vështirëson menaxhimin e emergjencës. Pacientët e spitalit janë transferuar për arsye sigurie në kinoteatrin e qytetit.
Dyshohet se disa banesa janë përfshirë nga flakët, por për shkak të tymit të dendur dhe terrenit të vështirë, ende nuk ka një bilanc të saktë të dëmeve. Forcat e ushtrisë dhe zjarrfikësit janë në terren dhe po punojnë për të frenuar përhapjen e zjarrit, ndërsa era e fortë që fryn drejt qytetit po e bën situatën edhe më të rrezikshme.
Pranë spitalit, janë marrë masa urgjente për të çmontuar dhe larguar sistemin e furnizimit me oksigjen, për të shmangur rrezikun e një shpërthimi në rast se flakët arrijnë godinën. I gjithë stafi mjekësor është në gatishmëri, duke përdorur çdo mjet në dispozicion për të mbrojtur ambientet.
Autoritetet u bëjnë thirrje banorëve të qëndrojnë të qetë dhe të ndjekin udhëzimet e forcave të rendit, për të shmangur pasoja të tjera.
