Ndërkohë që gjatë ndërrimit të viteve u bë shumë bujë për inaugurimin e Unazës së Madhe në Tiranë, banorët e zonës së Shkozës denoncojnë zvarritjen e punimeve në segmentin e njohur si Loti 4. Pavarësisht premtimeve dhe afateve të përcaktuara, kantieri vazhdon të jetë aktiv, por pa ritmin dhe seriozitetin e duhur.
Banorët shprehen se nuk kanë parë ndonjë supervizor apo përfaqësues të institucioneve që të kontrollojë ecurinë e punës, ndërsa kompania zbatuese e ka marrë projektin me shumë nge. Sipas banorëve po afron shtatori dhe shirat do të nisin, por me këtë ritëm është e pamundur që punimet të përfundojnë brenda vitit.
Përveç vonesave, shqetësime ka edhe për cilësinë e punimeve. Sipas banorëve, në disa segmente nuk është respektuar standardi minimal i ndërtimit, pasi asfaltit nuk i është vendosur as shtresa bazë me çakëll. Ata kërkojnë ndërhyrje të menjëhershme nga autoritetet përkatëse, përndryshe paralajmërojnë ndjekje të rrugëve ligjore, deri në kallëzim në SPAK.
"Përshëndetje JOQ. Për Vit të Ri, Kryeministri u mburr me inaugurimin e Unazës së Madhe, po punimet këtu në Shkozë te Loti 4 ende s’i kanë mbaruar. Nuk di a ka ndonjë drejtor transporti a ndonjë supervizor që i kontrollon këto të firmës, se shumë e kanë zvarritur punën. Po vjen shtatori e po fillojnë shirat, e këta e kanë marrë me shumë nge. Me këtë ritëm, as deri në fund të vitit nuk e mbarojnë. E për mos me fol për cilësi, ku kanë hedhur asfaltin, as 2 gishta çakëll s’i kanë vënë poshtë. Publikoje të lutem pa nxjerrë emrin, të ndërhyjë ndonjë nga shteti e t’i japë zgjidhje, se ndryshe veç t’i dërgojmë në SPAK u bë puna", shkruan qytetari për JOQ.
