Një aksident tragjik i ka marrë jetën një 70-vjeçari në fshatin Hamallaj të Durrësit, mëngjesin e së sotëm. I moshuari u përplas nga një automjet që drejtohej nga një 57-vjeçar, por për shkak të plagëve të rënda ndërroi jetë në spital.
Ky rast i rëndë shton edhe më tej bilancin tronditës të jetëve të humbura në aksidente rrugore gjatë vitit 2025.
Sipas të dhënave zyrtare nga Policia Rrugore, në 7 muajt e parë të këtij viti kanë ndodhur 767 aksidente, me 116 viktima në total, 32 më shumë krahasuar me të njëjtën periudhë të vitit të kaluar. Ndërkohë, megjithëse numri i aksidenteve dhe i të plagosurve ka rënë (961 të lënduar në 2025, nga 1,168 në 2024), rritja e ndjeshme e fataliteteve tregon se problemi po zhvendoset nga sasia te ashpërsia e përplasjes.
Shpejtësia mbi normat e lejuara, përdorimi i celularit gjatë drejtimit, mungesa e respektimit të përparësisë, por edhe sjellja e rrezikshme e këmbësorëve (33% e rasteve), janë ndër shkaqet më të zakonshme të aksidenteve me pasoja fatale.
