Presidenti rus Vladimir Putin ka propozuar një plan për armëpushim të menjëhershëm në Ukrainë, duke kërkuar që Kievi të tërheqë forcat nga Donbasi dhe të njohë zyrtarisht aneksimin e Krimesë nga Rusia. Sipas një raportimi të Wall Street Journal, plani iu paraqit të dërguarit amerikan Steve Witkoff gjatë një takimi të mbajtur në Moskë.
Plani, i ndarë në dy faza, parashikon fillimisht njohjen ndërkombëtare të kontrollit të Rusisë mbi rajonet e Donetskut dhe Luhanskut si dhe pranimin juridik të aneksimit të Krimesë, të pushtuar që prej vitit 2014. Pas kësaj, do të shpallej armëpushim përgjatë vijave aktuale të frontit në Kherson, Zaporizhzhia dhe Donbas.
Në fazën e dytë, Moska do të tërhiqej pjesërisht nga disa zona të pushtuara në Kherson dhe Zaporizhzhia, duke lejuar një marrëveshje paqeje nëpërmjet një formule shkëmbimi territorial. Aktualisht, Rusia kontrollon rreth 26% të rajonit të Khersonit, mbi 70% të Zaporizhzhias dhe mbi 80% të Donbasit.
Wall Street Journal raporton se ky propozim mund të diskutohet në një takim të mundshëm mes Putin dhe Presidentit amerikan Trump këtë të premte. Megjithatë, si Kievi ashtu edhe liderët evropianë e kanë pritur me skepticizëm, duke e cilësuar si një përpjekje të Kremlinit për të konsoliduar fitimet territoriale dhe për të ulur presionin nga sanksionet ndërkombëtare.
